Napoli nuk di më si të fitojë. Në ndeshjen që mbylli javën e 35 të Serie A, skuadra e teknikut Calzona nuk shkoi përtej barazimit 1-1 ndaj Udinese. Kështu, djemtë e teknikut Cannavaro rezistojnë në renditje në zonën e rënies. Në pjesën e parë në stadiumin “Blueenergy” u zhvillua një ndeshje e karakterizuar nga shumë duele, pak ritëm dhe zero goditje në portë. Në pjesën e dytë Osimhen (51') zhbllokoi ndeshjen me një goditje me kokë, pas një asisti të përsosur nga Politano. Pastaj, në kohën shtesë, Success (92') befasoi të kaltrit duke barazuar rezultatin në minutën e fundit dhe mbajti gjallë shpresat e bardhezinjve.
Kur kontestimi duket se po merrte formë, Success shfaqet dhe i jep Udineses një barazim të papritur. 1-1 sigurisht që nuk trondit renditjen, por prapëseprapë i afron bardhezinjtë me Empolin. Napoli e hedh rezultatin në kosh, si gjithmonë këtë sezon. Pavarësisht një paraqitje pa shumë shkëndija, skuadra e teknikut Calzona ishte në avantazh 1-0 deri në minutën e 90' dhe po shijonte ndeshjen e parë nën drejtimin e tij pa pësuar gola. Asgjë për të bërë, një tjetër 1-1 që është shumë pak i dobishëm. Sot Napoli do të ishte në Conference League, por Fiorentina ka një ndeshje më pak. E kthesa e shumëpritur tani duket vetëm si një mirazh.
SALERNITANA 1-2 ATALANTA
Atalanta mposht Salernitanën 2-1 në ndeshjen e javës së 35 të Serie A dhe bashkohet me Romën në vendin e pestë, duke u rikthyer në zonën e Champions League, me ende një ndeshje më pak se verdhekuqtë. Skuadra kampane, tashmë e rënë nga kategoria, luajti një pjesë të parë mjaft krenare, duke e zhbllokuar ndeshjen pas 18' me golin e mrekullueshëm të Tchaouna. Në pjesën e dytë, megjithatë, djemtë e Gasperinit me meritë e përmbysën rezultatin, falë goditjes së Scamacca (57') dhe të majtës së shkëlqyer të Koopmeiners (63'). Nis në mënyrën më të mirë periudha e zjarrit për bergamaskët, tani në pritje të ndeshjes së dytë gjysmëfinale në Europa League me Marseille, më pas përplasjen vendimtare me Romën dhe në fund finalen e Kupës së Italisë me Juventus.
