Një shqiptar i shkarkuar nga puna e tij si roje në këshillin e qytetit të Glasgout në Skoci ka bërë padi në gjykatë duke e konsideruar largimin e tij për shkaqe racore dhe diskriminuese. Ai u pushua nga puna pasi u akuzua për vjedhje, por 48-vjeçari Edi Veizi, baba i dy fëmijëve, mohon çdo akuzë.
Shqiptari me pasaportë britanike thotë se po lufton për të pastruar emrin e tij pasi shefat e kishin etiketuar si “mafioz shqiptar”. Në gjykatë u dëgjua se menaxherët i referoheshin atij si “shqiptari” në email-e.
Shkak ishin lidhjet e tij me kriminelin e dyshuar shqiptar Sokol Sefaj, i cili tashmë ka ndërruar jetë dhe që ishte miku i Veizit. Duke folur para gjykatës, Veizi pohoi: “Unë nuk jam hajdut. Kam punuar shumë gjatë gjithë jetës sime. E doja punën time. U bëra për vetëvrasje pasi po diskriminohesha si shqiptar”.
Veizi ka punuar në këshill nga viti 2001 deri në vitin 2019 kur humbi detyrën pas një seance disiplinore i akuzuar për vjedhje mallrash. Veizi i tha gjykatës se ai u quajt "mafioz shqiptar" dhe "dhomë droge" nga kolegët e tjerë, si pjesë e ngacmimeve verbale. Ai tha se komentet bëheshin rregullisht kur ai vizitonte zyrat për të kryer detyrat e tij.
Duke iu përgjigjur pyetjeve të një avokati në gjykatë, Veizi tha se nuk kishte njohuri për aktivitetet e Sefaj qe ishte i përfshirë në krimin e organizuar dhe e përshkroi atë si një "person normal" dhe "njeri familjar me dy fëmijë". Duke e përshkruar Sefaj si një "mik", Veizi tha se "nëse nuk u dënua ai është një person normal”. Duke shpjeguar se si vdiq Sefaj, Veizi tha: “Ai vdiq për shkaqe normale”. ©LAPSI.al
