Në Maqedoninë e Veriut ka nisur numërimi i votave për zgjedhjet e përgjithshme dhe ato presidenciale të mbajtura këtë të mërkurë. Nga hapja e 36.8% e kutive vihet re një rezultat katastrofik për partinë në pushtet, LSDM-në që deri tani numëron vetëm 12.02% të votave për zgjedhjet e parlamentit të ri.
Në vend të parë është koalicioni i opozitës maqedonase i drejtuar nga VMRO-DPMNE që aktualisht ka 35.24% të votave.
Sa u përket partive shqiptare, një rezultat të mirë duket se ka marrë koalicioni “Fronti Europian” që drejtohet nga BDI-ja e Ali Ahmetit që për momentin ka 20.94% të votave duke u renditur të dytët pas VMRO-së së Hristian Mickoskit. Nisur nga këto rezultate, Arbër Ademi tha se mund të arrin deri në 20 deputetë.
Ndërsa koalicioni “VLEN” i partive shqiptare opozitare ka deri tani ka 17.7% të votave.
Një fitore të rëndësishme VMRO-DPMNE po merr edhe në zgjedhjet presidenciale që u zhvilluan njëkohësisht këtë të mërkurë. Nga të dhënat e 51.6% të kutive të numëruara, kandidatja e opozitës Gordana Siljanovska Davkova numëron 63,42% të votave, më shumë se dyfishi i 30,07% që ka Stevo Pendarovski i LSDM-së. ©LAPSI.al
