Policia e Tiranës arrestoi të dashurin e polices Aldorjana Loshi, 21 vjeçe që u vetëvra një ditë më parë me armën e shërbimit në banesën e saj. Policia thotë se i riu akuzohet për fshehje të së vërtetës pasi ka fshirë mesazhet nga telefoni i efektives së policisë.
“Në vijim të informacionit paraprak të dhënë ditën e djeshme, ku në rrugën "Todi Shkurti", është vetëvrarë me armën e shërbimit shtetasja A. L., 21 vjeçe, punonjëse policie pranë Komisariatit të Policisë Nr. 5, specialistët për Hetimin e Krimeve të Komisariatit të Policisë Nr. 1, arrestuan shtetasin E. N., 28 vjeç, banues në Kamëz, për veprën penale "Veprime që pengojnë zbulimin e së vërtetës".
Ky shtetas dyshohet se ditën e djeshme ka shkuar në banesën e shtetases A. L., dhe pasi ka njoftuar Policinë për ngjarjen e ndodhur, ka fshirë mesazhet me shtetasen A. L., në telefonin e saj. Materialet i kaluan Prokurorisë” – thuhet në njoftimin e policisë. ©LAPSI.al
