“Kemi udhëhequr kampionatin që nga java e 3-të. Skuadra është maksimalisht e përqendruar dhe e kemi përgatitur gjithçka në detaje. Besoj se do të bëjmë më të mirën. Lojtarët do të luajnë me të gjitha forcat e tyre”. Kështu është shprehur tekniku Edlir Tetova në konferencën për shtyp të vigjiljes, duke treguar se nuk i trembet kundërshtarit të titulluar.
Egnatia kërkon të shkruajë historinë të dielën, në shansin e parë për të fituar titullin e parë kampion në histori. Rrogozhinasit kanë kryesuar gjatë gjithë sezonit të rregullt e tani do të sfidojnë kampionët në fuqi, që u renditën me pikë të barabarta, por pas tyre falë ndeshjeve direkte: “Nuk besoj se vlen eksperienca – tha Tetova -. Është një format i ri dhe gjithçka e re. Ekipi im pas Kupës ka entuziazëm dhe jam i bindur se do të japim më të mirën”.
SUPERKUPA NUK KA LIDHJE
Me statistikat sezonale pothuaj në ekuilibër të plota, tre barazime një fitore për rrogozhinasit e një në Superkupë për të kuqtë, ku edhe para portës kanë shënuar njësoj, nga 51 herë, për Tetovën, do të jetë një ndeshje e vendosur nga episodet. “Superkupa? Kjo është diçka tjetër dhe besoj se kjo finale ka dinamikë tjetër. Rast i rrallë që për 1 vit të prekësh 4 finale. Kjo i bën mirë ekipit të luajë në finale dhe finalja e Superkupës dhe ajo e nesërmja nuk kanë asnjë lidhje”.
Lexo më tej: “Nuk ka të nesërme”. Orges Shehi kërkon titullin e dytë: atë që i rrëmbeu, Partizani ka mudnësia tja kthejë
Egnatia vjen në këtë përballje pasi ka fituar Kupën e Shqipërisë për të dytin vit radhazi e tani kërkon të ulet në tavolinën e të mëdhenjve, duke fituar titullin kampion. “Kjo nuk është një ndeshje trajnerësh, janë lojtarët ata që do të thonë fjalët e tyre. Nuk dua të shprehem për kundërshtarin. Gjithkush merr masat e tij. Mendoj vetëm për ekipin tim dhe të japim maksimumin”.
