Zgjedhje deri diku të kondicionuara për shkak të një ndeshje që duhet vazhduar me të njëjtët lojtarë që ishin në fushë. Shqipëria U-21 do të luajë ndeshjen e shtyrë ndaj Malit të Zi U-21, e vlefshme për kualifikueset e “Euro 2025” më datë 7 qershor në orën 20:00, në stadiumin “DG Arena” të Podgoricës. Ndeshja, e cila u ndërpre më datë 21 nëntor 2023 për shkak të kushteve atmosferike, do të luhet më 7 qershor dhe do të rinisë nga minuta e 27’.
Gjithashtu është arritur dakortësia që kuqezinjtë e rinj të zhvillojnë edhe një ndeshje miqësore me Lihtenshtejnin më datë 11 qershor në orën 19:00, në stadiumin “Niko Dovana”.
Trajneri i Kombëtares U-21, Alban Bushi, ka shpallur edhe listën me emrat e 23 lojtarëve të ftuar për dy ndeshjet e qershorit. 13 lojtarë vijnë nga klubet e kampionatit shqiptar, kurse pjesa tjetër aktivizohen në kampionatet jashtë vendit.
Lexo më tej: "Fetai si Modric". Alban Bushi paralajmëron Finlandën dhe Zvicrën: "Ndeshja e jetës, duam Europianin"
Përfaqësuesja Shpresa, në kualifikueset e Europianit, ndodhet në Grupin E bashkë me Rumaninë, Zvicrën, Finlandën, Malin e Zi dhe Armeninë, teksa renditet në vendin e katërt me dhjetë pikë.
Ekipi i drejtuar nga Alban Bushi do të nisë që sot grumbullimin në Durrës aty ku fillimisht kuqezinjtë do të përgatiten në kuadër të ndeshjes kualifikuese ndaj Malit të Zi.
