Kryetarja e bashkisë së Cotija në Meksikë, Yolanda Sánchez Figueroa, u qëllua për vdekje me armë zjarri mbrëmjen e së hënës, një ditë pas fitores triumfuese të Claudia Sheinbaum në zgjedhjet presidenciale të vendit.
Sipas mediave lokale, të panjohurit i zunë pritë Figueroas teksa ajo hynte në një palestër me truprojën e saj. Sipas të njëjtave burime, kryebashkiakja është plagosur gjatë shkëmbimit të të shtënave, e më pas ajo është dërguar në spital ku ka ndërruar jetë.
Figueroa u rrëmbye në shtator të vitit 2023 në qytetin e Zapopanit, kur persona të armatosur i zunë pritë makinës së saj ndërsa ajo po ngiste pa shoqërues.
Në atë kohë, në fakt, ishte bërë e ditur se një nga organizatat kriminale aktive në Meksikë kishte kërcënuar me vdekje Figueroa-n para rrëmbimit të saj.
