Shqipëria U-21 triumfoi 4-0 në ndeshjen miqësore ndaj Lihtenshtejnit e zhvilluar në stadiumin “Niko Dovana”. Kuqezinjtë dominuan takimin dhe golat e fitores i shënuan Adrion Pajaziti, Erald Maksuti, Ermir Rashica dhe Arda Kurtulan.
Ndeshja nisi shumë mirë për Shqipërinë U-21 që u shfaq rrezikshëm në portën kundërshtare që në minutat e para të takimit. Pas disa rasteve të mira kuqezinjtë zhbllokuan rezultatin me penallti. Në minutën e 37' kapiteni Adrion Pajaziti goditi saktë nga pika e bardhë, duke bërë 1-0. Katër minuta më pas, Shqipëria U-21 realizoi edhe golin e dytë. Erald Maksuti dyfishoi rezultatin. Pjesa e parë u mbyll 2-0.
Fraksioni i dytë nisi me të njëjtin ritëm për kuqezinjtë që shënuan edhe golin e tretë në minutën e 53'. Këtë herë ishte Ermir Rashica ai që e dërgoi topin në rrjetë. Trajneri Alban Bushi aktivizoi në pjesën e dytë edhe Endri Demën, Arda Kurtulan, Ardit Nikajn, Rei Pecanin, Paulo Buxhelajn dhe Ajdi Dajkon. Kur gjithçka po përfundonte 3-0, Kurtulan fitoi një penallti dhe e shndërroi po vetë në gol. Në fund ndeshja u mbyll me fitoren e Shqipërisë U-21 me rezultatin 4-0.
Lexo më tej: Rrebeshi në Podgoricë ndërpret ndeshjen e kombëtares : ja kur do të luhet ndeshja me Malin e Zi U21
Formacioni i Bushit: Antezelo Sina (GK), Marcelino Preka, Geralb Smajli, Adrion Pajaziti (C), Ermis Selimaj, Elmando Gjini, Klevi Qefalia, Rejan Alivoda, Ermir Rashica, Arlind Rexhepi, Erald Maksuti.
