Zëdhënësja e grupimit të Lulzim Bashës, Mirela Karabina ka denoncuar se Unaza e Madhe është “viktimë e korrupsionit të ministres Belinda Balluku dhe ARRSH”.
“Segmenti rrugor Mbikalimi Pallati me Shigjeta-Rrethrrotullimi Shqiponja (lot 1) është nyja më e rëndësishme hyrëse/dalëse për qytetin e Tiranës që frekuentohet gjatë ditës nga një trafik shumë i lartë automjetesh të tonazheve të ndryshme”, tha ajo, duke shtuar se “në 6 vite qeveria ka bërë rreth 300 metra rrugë në vit”.
Mirela Karabina, theksoi se, edhe pse ministrja Belinda Balluku premtoi që në shtator të 2023-it do të kishin përfunduar të gjitha lotet që kompletonin Unazën e Madhe të Tiranës ky segment dhe të tjerë ende nuk kanë përfunduar.
“Ky segment rruge që fillon nga pallati me Shigjeta e deri tek sheshi Sheshi Shqiponja është 2.2 kilometra dhe kostoja fillestare, denoncuar asokohe dhe nga PD, është 20 milion euro për një kilometër, shifër kjo 8 apo 9 herë më e lartë se sa kostoja e Bypass- it të Vlorës dhe të Fierit të ndërtuar me fonde të BE-së dhe mbikqyrur nga to”, u shpreh Karabina.
