Akuza të rënda janë ngritur nga një media lokale në Gjermani ndaj stafit të kombëtares shqiptare të futbollit. Sipas medias gjermane “ruhrnachrichten”, ndaj një anëtari të stafit të kombëtares shqiptare të futbollit janë ngritur akuza nga prokuroria e Dortmundit për krim seksual. Sipas tyre, ngjarja dyshohet te ketë ndodhur gjatë qëndrimit të kombëtares shqiptare në qendrën sportive Kaiserau në Kamen.
“Më 23 qershor, punonjësi i stafit mësohet se ka kapur nga krahu një punonjëse të qendrës sportive dhe ka kryer akte seksuale kundër kundër vullnetit të saj. Autoriteti policor i qarkut Unna u informua për incidentin rreth orës 19:30, konfirmoi zëdhënësi i policisë Bernd Pentrop. Ngjarja mësohet se ka ndodhur menjëherë para nisjes së kombëtares shqiptare drejt Dyseldorfit, aty ku u luajt ndeshja e tretë në Euro 2024 ndaj Spanjës.
Prokuroria publike nuk ka dhënë më shumë informacion rreth gjendjes së viktimës së dyshuar. Sipas prokurores publike Sonja Frodermann, ajo nuk ka dijeni për ndonjë lëndim fizik të viktimës apo qëndrim në spital.
Meike Ebbert, kreu i qendrës sportive Kaiserau, gjithashtu nuk donte të jepte më shumë informacione. “Kujdesi për punonjësen dhe mbrojtja e të drejtave të saj personale janë prioriteti ynë kryesor”, tha Ebbert, i cili gjithashtu konfirmoi incidentin. “Ky sulm plotëson dyshimin fillestar për përdhunim”, tha shefi i departamentit. Megjithatë, zyra e prokurorit publik nuk e përmendi në mënyrë eksplicite përdhunimin në deklaratën e saj”, shkruan media gjermane.
