Federata Franceze e Futbollit (FFF) synon të paraqesë një ankesë në FIFA dhe të ndërmarrë veprime ligjore pas thirrjeve raciste nga anëtarët e ekipit kombëtar të Argjentinës, fitues i Kupës së Amerikës. Presidenti i FFF-së, Philippe Diallo, "dënoi me shprehjet më të forta deklaratat e papranueshme raciste dhe diskriminuese të drejtuara ndaj lojtarëve të kombëtares franceze". Thirrjet u dëgjuan gjatë një videoje live të postuar në rrjetet sociale nga mesfushori i Chelsea dhe Argjentinës Enzo Fernandez, nga autobusi i ekipit, gjatë festimeve të fitores.
Disa lojtarë, përfshirë Fernandez, përsëritën një këngë që lidhet me finalen e Kupës së Botës 2022, të cilën Argjentina e fitoi ndaj Francës, e cila shënjestron Kylian Mbappé dhe përfshin fyerje homofobike ("Ata luajnë për Francën, por prindërit e tyre janë nga Angola. Nëna e tyre është nga Kameruni, ndërsa babai është nga Nigeria. Por pasaporta e tyre thotë franceze").
Lexo më tej:
Video/ Messi i dëmtuar e në lot në pankinë, Lautaro i dhuron Argjentinës Kupën e Amerikës
“Përballë peshës së këtyre deklaratave tronditëse, në kundërshtim me vlerat e sportit dhe të drejtave të njeriut, presidenti i FFF ka vendosur të sfidojë drejtpërdrejt homologun e tij argjentinas dhe FIFA-n dhe të bëjë një ankesë ligjore për komente fyese raciste dhe diskriminuese".
Wesley Fofana, bashkëlojtari i Fernandez te Chelsea, kritikoi videon në rrjetet sociale. “Futbolli në 2024: racizëm pa komplekse”, tha francezi në X. Ministrja franceze e Sportit, Amelie Oudea-Castera, i kërkoi gjithashtu FIFA-s të ndërhynte. Të gjithë lojtarët francezë të Chelsea me origjinë afrikane (Wesley Fofana, Axel Disasi, Benoît Badiashile, Malo Gusto, Lesley Ugochukëu, Christopher Nkunku) ndaluan së ndjekuri Fernandez në Instagram.
