Dy ditë para zgjedhjeve të Himarës, kryeministri Rama ka paralajmëruar fitoren në Himarë duke lënë të kuptohet se sondazhet e nxjerrin fitues kandidatin e tij Vangjel Tavo.
Duke folur me Vangjel Tavon, Blendi Klosin dhe Damian Gjiknurin, Rama u ndal në akuzat e opozitës për zgjedhje të manipuluara. Ai tha se është çmenduri të mendosh se PS blen votat, sepse në fakt fitorja i vjen nga makineria elektorale dhe sondazhet që e nxjerrin fitues Tavon.
"Gjëja që nuk kuptojnë dhe nuk kanë për ta kuptuar kurrë. Kur del ai atje dhe thotë "Do bëjmë tërmet!", kur del ky tjetri dhe thotë "Do bëhet breshër", kur dal unë dhe them shifra, këta kujtojnë se ne kemi ndarë lekët dhe kemi blerë votat. Kjo është çmenduri! Ne ndërkohë kemi sistemin që e dimë paraprakisht rezultatin për shkak të kontakteve dhe për shkak të sondazheve. Ne kemi bërë sondazhet këtu në Himarë. I kemi bërë në fillim kur u vu Vangjeli dhe para një jave dhe e dimë se ku do të dali rezultati. Makineria jonë është moderne!" tha Rama.
Kryeministri harron se në 14 Maj në Himarë i humbi zgjedhjet dhe kur "makineria elektorale moderne nuk i funksionoi", ai futi në lojë forcat operacionale të policisë së shtetit, prokurorinë e Vlorës, prokurorët e SPAK dhe Gjykatat e Posaçme.
Para se të kishte në kontroll drejtësinë, në zgjedhjet e 2017, Rama përdorte drejtorët e Ministrisë së Brendshme, si Arben Keshi, një person që shpërndante para në Dibër për votat dhe me të cilin Rama është përgjuar duke i kërkuar të arrihej objektivi.
