Pritshmëritë e mëdha sjellin edhe zhgënjime të mëdha, kur nuk përmbushen. Ashtu si Luiza Gega, që nuk ia ka dalë që të kualifikohet në finalen e 3000 metrave me pengesa në Lojërat Olimpike Paris 2024. Atletja shqiptare, që ndihej në formën më të mirë pas përgatitjeve në Kenia, nuk ka mundur të shprehet në garë, duke u renditur vetëm e 9 dhe në këtë mënyrë e eliminuar nga Olimpiada.
Gega, ish-kampionë e Europës, garonte në baterinë e dytë të kualifikueseve. 35 vjeçarja nuk mundi të rivalizonte me kundërshtaret e saj për 5 vendet e para që vlenin kualifikimin për në finale. Luiza regjistroi kohën 9:27:41 në baterinë e saj, që ishte vetëm koha e 9 më e mira. Atletja shqiptare shfaqi vështirësi të mëdha sidomos në dy xhirot e fundit, duke lejuar që ëndërra për medalje të mbaronte aty.
Lexo më tej: Atletikë/ Luiza Gega, medalje e artë në Serbi: sportistja e parë shqiptare që kualifikohet në Olimpiadën Paris 2024
Yavi e Bahreinit u rendit në vendin e parë me kohën 9:15:11, duke lënë pas etiopianen Almayeë dhe amerikanen Constein. Vendi i pestë dhe i fundit që u kualifikua nga kjo bateri për në finalen e madhe të 3000 metrave me pengesa, ishte i kazakes Jeruto, që regjistroi kohën 9:16:46, praktikisht 11 sekonda larg nga koha që arriti Gega në Paris.
