Pas humbjes në Himarë, kandidati i opozitës Petro Gjikuria tha se në krye të bashkisë do të jetë një kryetar që do t'i shërbejë interesave të Edi Ramës. Sipas tij shkak për humbjen ishin metodat jodemokratike që përdori pushteti si shtimi i zgjedhësve në lista dhe mohimi i votës për mbështetësit e opozitës.
"Patëm një betejë të madhe. Një betejë e cila ishte vazhdim i shumë betejave të mëdha që kanë bërë himariotët, sidomos vitet e fundit të udhëhequr nga Fredi Beleri. Kjo betejë ishte pararojë e betejave të ardhshme që do të thirremi për vendin tonë. Në këto zgjedhje pamë metoda antidemokratike në të gjitha stadet e tyre. Rezultati ishte produkt i transformimit të listës së zgjedhësve me qëllim përshtatjen e saj me interesat e kundërshtarëve tanë, duke i dhënë mundësinë një ushtrie partiake të merrte pjesë në zgjedhje dhe njëkohësisht, duke u mohuar këtë të drejtë mijëra qytetarëve të Himarës, si dhe duke përfshirë shtetin dhe parashtetin. Qëllimi ishte patja e një tjetër kryebashkiaku të dobët, i cili do t’u shërbejë interesave të Edi Ramës dhe partisë së tij. Dëshiroj të falënderoj të gjithë ata që ndihmuan në këtë fushatë elektorale për garën e bukur dhe të ndershme që bëmë. Beteja për të nesërmen e Himarës vazhdon" ka shkruar Gjikuria.
Opozita humbi me një diferencë prej 477 votash në Himarë. Vangjel Tavo i PS mori 5022 vota ndërsa Petro Gjikuria, një emigrant në SHBA, i afërt me lobin grek mori 3545 vota. Më herët, kandidati fitues i opozitës, Fredi Beleri që fitoi me 19 vota u arrestua dhe u burgos.
