Marina ruse është e përgatitur të godasë vendet shumë brenda Evropës me raketa bërthamore. Kjo u zbulua nga dosjet sekrete të parë nga Financial Times, sipas të cilave, në një konflikt të mundshëm me NATO-n, do të shënjestroheshin caqe të largëta si bregdeti perëndimor i Francës dhe Barrow-in-Furness në Mbretërinë e Bashkuar.
Në rreth tridhjetë dosje të paraqitura nga burime perëndimore për gazetën britanike, detajohen planet për pushtimin në shkallë të gjerë të Ukrainës, të cilat parashikonin gjithashtu mundësinë e një konfrontimi ushtarak me NATO-n.
Në këtë rast, marinës ruse do t’i duhej të godiste shumë përtej kufirit me vendet e Aleancës me një seri sulmesh dërrmuese në të gjithë Evropën Perëndimore. Dosjet përmbajnë gjithashtu një simulim të një sulmi taktik me armë bërthamore në fazat e hershme të një konflikti me një fuqi të madhe botërore.
