Të paktën 48 persona kanë humbur jetën në shtetin nigerian qendror të Nigerit, pasi një cisternë karburanti u përplas me një kamion që transportonte pasagjerë dhe bagëti, tha agjencia e vendit për fatkeqësitë. Agjencia Shtetërore e Menaxhimit të Emergjencave të Nigerit tha se përplasja ndodhi rreth orës 00:30 me orën lokale të dielën dhe shkaktoi një shpërthim që përfshiu të dy automjetet.
Drejtori i përgjithshëm i agjencisë, Abdullahi Baba-arah, tha se ekipet e reagimit ishin dërguar në vendngjarje për të menaxhuar situatën. Nga shpërthimi janë dëmtuar edhe një sërë automjetesh të tjera. Pamjet e marra nga vendi i ngjarjes menjëherë pas ngjarjes tregojnë dy automjetet, të cilat janë djegur tërësisht, si dhe një numër bagëtish të ngordhura.
Duke folur për agjencinë e lajmeve Reuters pas incidentit, një punonjës i shpëtimit emergjent tha se ata po punonin për të gjetur trupa, si dhe kafshë të ngordhura që ishin ende brenda automjetit.
Sipas mediave shtetërore, një varrim masiv po bëhet për viktimat. Guvernatori Umaru Bago tha se ai ishte “i tmerruar nga incidenti fatkeq” dhe çoi një mesazh ngushëllimi për familjet e viktimave.
