Sot, 11 shtator 2024, lideri i opozitës, Sali Berisha thirret për herë të dytë në SPAK.
Deputetë dhe pjesëtarë të strukturave të PD-së do të jenë të pranishëm sot në orën 12:00 përpara SPAK.
Sekretari i Përgjithshëm, Flamur Noka dhe kreu i Grupit Parlamentar, Gazment Bardhi kanë kërkuar mobilizimin e deputetëve dhe strukturave për të mbështetur kryedemokratin, sipas tyre, në përballjen e tij të radhës me drejtësinë politike, nën dirigjimin e kryeministrit Edi Rama.
Lideri i opozitës, Sali Berisha ndodhet në arrest shtëpie që prej 30 dhjetorit 2023.
Mesazhi i Sekretarit të Përgjithshëm të PD për protestë ditën e mërkurë:
“Të dashur miq. Ditën e mërkurë në ora 12:00 kryetari i PD Prof. Dr. Sali Berisha do shkojë pranë organizatës kriminale të SKAP. Të mobilizohemi të gjithë maksimalisht për protestë të fuqishme solidariteti me të drejtën, me të vërtetën, kundër narkodrejtësisë”.
Mesazhi i Kryetarit të Grupit Parlamentar të PD për protestë ditën e mërkurë:
“Të nderuar kolegë, të mërkurën në 12:00, do të jemi përpara SPAK, sipas njoftimit që është bërë publik. Ndërkohë, mbledhjen e radhës së Grupit Parlamentar, lidhur me seancën plenare, do ta zhvillojmë, të enjten, ora 09:00, në seli. Ju falënderoj”.
