Qyteti i Shkodrës dhe rrethinat janë përfshirë nga moti i keq pasditen e kësaj të marte. Bashkia njofton se megjithatë të gjitha akset rrugore janë të kalueshme në qytet.
“Ka prezencë të shtuar uji pranë Bulevardit “Skënderbeu”, në Sheshin “Isa Boletini”, në Sheshin “Demokracia” dhe pranë Urës Dervishbeg. Nga ana e Bashkisë Shkodër, janë të angazhuar në terren të gjithë punonjësit e Ndërmarrjes së Shërbimeve Publike dhe Policisë Bashkiake.
Ndërmarrja e Ujësjellës Kanalizime ka në terren punonjës dhe mjete të specializuara për largimin e ujit por intensiteti i lartë i reshjeve që vazhdon e bën të vështirë ndërhyrjen. Si pasojë e motit të keq disa fshatra nuk furnizohen me energji elektrike” – thuhet në njoftim.
Banorëve u është kërkuar që të mos dalin nga shtëpia për lëvizje të panevojshme.
“I gjithë territori i Bashkisë Shkodër është përfshirë nga mot me reshje me intensitet të lartë dhe erëra të forta. Si pasojë në disa segmente rrugore në qytet dhe fshat ka prezencë uji. Grupet e ujësjellësit dhe të ndërmarrjeve të Bashkisë Shkodër janë ne terren për të monitoruar situatën dhe për t’i ardhur në ndihmë banorëve.
Ju bëjmë apel që gjatë orëve të evitoni daljet nga banesat, vetëm për arsye të domosdoshme. Për çdo problematikë grupet tona janë në terren dhe për çdo rast emergjent kontaktoni në numrin ☎️ 128” – thuhet në njoftim. ©LAPSI.al
