Prodhuesi japonez i lodrave, MegaHouse ka prodhuar një kub Rubiku në miniaturë. Është aq i vogël sa mund t'ju duhen një palë piskatore për ta zgjidhur. Çdo faqe e kubit, i cili është bërë prej alumini, është rreth 5 milimetra e gjerë.
Ai u vu në shitje me porosi në faqen e internetit të kompanisë të enjten. Dërgesat pritet të shpërndahen në prillin e ardhshëm. "Kubi i Rubikut prej 5 milimetrash është rezultat i trinitetit të makinerive, veglave prerëse dhe pasionit të lojtarëve" - tha Kiyokazu Saito, president i Iriso Precision, kompania e njohur për prerjen me saktësi.
Me peshë vetëm 0,3 gram, kubi është rreth një e 1000-ta e madhësisë së origjinalit.
MegaHouse i tha CNN se kompania filloi ta konceptonte atë 4 vjet më parë dhe filloi procesin për ta prodhuar në 2022. Rekordet Botërore të Guinness konfirmuan në gusht mikro-kubin si më i vogli në botë. Modeli ka thyer rekordin e vendosur nga stilisti britanik i enigmave Tony Fisher në vitin 2016, kur ai i befasoi fansat me një version 5.6 milimetrash.
Kubat shiten me 777 777 jen (5 320 dollarë) dhe secili vjen me një stendë që e shpall atë "Rekordi i Kubit të Rubikut më të vogël në botë". Publikimi përkon me 50-vjetorin e shpikjes së kubit i cili numëron miliona amatorë dhe profesionistë ndër ndjekësit e tij më të mëdhenj. Mbi 500 milionë kube janë shitur që kur shpikësi hungarez Ernő Rubik e krijoi atë në 1974.
Turne të tij mbahen në mbarë botën çdo vit me pjesëmarrës që konkurrojnë për titullin e zgjidhësit më të shpejtë për fraksione të sekondës.
Mbajtësi aktual i rekordit për një kub standard është 22-vjeçari koreano-amerikan Max Park, i cili zgjidhi Kubin e Rubikut në 3.13 sekonda në një konkurs në Long Beach, Kaliforni vitin e kaluar, i ndjekur nga 10-vjeçari Wang Yiheng nga Kina, i cili arriti më të mirën e tij prej 3.38 sekondash në një konkurs në vendin e tij në gusht, sipas Shoqatës Botërore të Kubit. ©CNN, LAPSI.al
