Qeveria italiane ka miratuar një dekret të ri ligjor për emigrantët pas vendimit të gjykatës së Romës për 12 personat që mbaheshin në kampin e Gjadrit. ANSA shkruan se dispozita bën përcaktimin e vendeve “të sigurta për riatdhesim” si rregull parësor dhe jo më dytësor.
Qëllimi i ndryshimeve ka të bëjë me shmangien e referimit të vendimit të Gjykatës së BE-së, të cilës iu referuar Gjykata e Romës, në rastin e emigrantëve të akomoduar në kampin e Gjadrit.
Lista e vendeve të sigurta, “që zbatojnë indikacionet e vendimit të fundit të Gjykatës së Drejtësisë së BE", është rishikuar dhe do të përditësohet periodikisht. Vendimi i qeverisë italiane hoqi vendet nga lista e “vendeve të sigurta” ato për të cilat ishin parashikuar "përjashtimet territoriale" (Kameruni, Kolumbia dhe Nigeria). Lista e re ka tashmë fuqinë dhe vlerën e ligjit.
“Dispozita lindi nga një vendim shumë kompleks dhe i detajuar i Gjykatës Evropiane të Drejtësisë dhe i shkruar në frëngjisht që ndoshta nuk u kuptua mirë ose nuk u lexua mirë nga gjyqtarët” – u shpreh ministri italian i Drejtësisë Carlo Nordio në një konferencë për shtyp në Palazzo Chigi. ©LAPSI.al
