Në ditën ku arrestimi i Ilir Metës ra si rrufe në qiell të hapur, Sali Berisha dhe Edi Rama do të mbledhin të dy kryesitë e partive në ora 18:00, edhe pse për arsye krejt të ndryshme.
Rama do të mbledhë kryesinë për zgjedhjet e 2025-s, ndërsa Berisha do ta bëjë si pasojë e arrestimit brutal të Metës. (Kliko këto për pamjet)
Partia Socialiste do të mbledhë pasditen e sotme Kryesinë në kuadër të përgatitjeve për zgjedhjet parlamentare të 2025-ës. Mbledhja e Kryesisë së PS-së, e cila do të mblidhet në orën 18:00, do të drejtohet nga Kryeministri Edi Rama.
Kjo mbledhje kryesie është në vijim të proceseve që partia në pushtet po bën lidhur me përgatitjen e strukturave dhe organizimin në funksion të zgjedhjeve parlamentare.
Mbledhja e fundit e Kryesisë së PS-së u mbajt në fund të muajit shtator ku u vendosën piketat lidhur me përgatitjet për zgjedhjet.
Lidhur me arrestimin e ish-Presidentit Ilir Meta, Gjençaj tha se ende nuk ka ndonjë reagim nga socialistët.
Partia Demokratike do të zhvillojë një mbledhje të Kryesisë së saj në orën 18:00, disa orë pas arrestimit të ish-Presidentit të Republikës, Ilir Meta, me urdhër të SPAK.
Anëtarëve të kryesisë së PD-së pritet t’iu drejtohet me një mesazh përmes teknologjisë edhe kreu demokrat, Sali Berisha.
Ky i fundit u tregua i ashpër në reagimet që dha lidhur me arrestimin e Metës, duke e cilësuar si akt monstruoz. Berisha në reagim tha se Meta është goditur nga ata që i konsideroi si kriminelë me uniformë që rrëmbyen ish-Presidentin e Republikës.
Më herët kreu demokrat kërkoi dorëheqjen e Kryeministrit Edi Rama, ndërsa në mbledhjen e sotme pritet të vendoset një ashpërsim në qëndrim nga opozita, e cila ka shpallur “mosbindjen civile” pas burgosjes së Ervin Salianjit. Në mbledhjen e sotme pritet të vendoset mbajtja e një tjetër proteste në Tiranë.
Mbledhja e Kryesisë së PD-së, zhvillohet në të njëjtën orë me atë të PS-së. Kjo e fundit pritet të diskutojë mbi përgatitjet lidhur me zgjedhjet e ardhshme parlamentare. ©Lapsi.al
