Në Shqipëri vazhdojnë të dënohen për blerje votash përfaqësuesit e opozitës.
Pas Fredi Belerit, i shpallur fajtor dhe i dënuar për blerje votash, sot nga Gjykata e Posaçme është dënuar ish-kryeplaku i Bërxullës në Tiranë.
Ky i fundit akuzohej nga SPAK se kishte blerë vota në favor të të bijës së tij, ish-kandidate e opozitës në Vorë.
Sipas SPAK, Agim Loci është angazhuar në fushatën e zgjedhjeve vendore të datës 14 Maj, të vitit 2023, për bashkinë Vorë, ku shtetësja me iniciale A. L., e bija e Agim Locit, ishte në listën e kandidatëve për Këshillin Bashkiak, si pjesë e një prej koalicioneve pjesëmarrëse në zgjedhje.
Loci ka rezultuar se i ka ofruar shtetasit me iniciale A.K. para me vlerë prej 10 000 (dhjetë mijë) lekë, për të ndikuar në vullnetin e tij, në mënyrë që të votojë një subjekt të caktuar politik në Zgjedhjet për Organet e Qeverisjes Vendore, më 14 Maj 2023.
Agim Loci nuk do të bëjë burgim, sepse përfitoi nga gjykimi i shkurtuar, por do e shlyejë me 80 orë pune në komunitet. Akuza penale ndaj tij e ngritur nga SPAK ishte “korrupsion zgjedhor”.
Në një vend ku mazhorancës i kanë plasur në duar skandale masive blerjesh votash si dosja 339 dhe 184, sipas drejtësisë së re blerjet e votës i kryen opozita. ©Lapsi.al
Lexo më tej: Mesazhi i kriptuar i Berishës për Ilir Metën e kyçur në qeli
