Ish-presidenti dhe kandidati për president në SHBA, Donald Trump ka votuar sot në Florida, i shoqëruar nga bashkëshortja e tij Melania Trump.
Trump i është përgjigjur pyetjeve të gazetarëve nga qendra e votimit, duke thënë se ndihet i bindur dhe i sigurt në fitore.
Ai tha se republikanët kanë dalë masivisht në votime mëngjesin e këtij 5 nëntori në çdo shtet të SHBA-së.
“Ne i duam të gjithë, ne do të jemi gjithëpërfshirës. Kemi një shtet të mrekullueshëm, por shteti ynë është në telashe. Kemi nivel të madh krimi në rrugë, emigrantë ilegalë që vërshojnë në kufij. Nuk na duhen këto. Ndihem shumë i sigurt. Republikanët kanë dalë masivish, të shohim si do të dalë, por më rezulton që republikanët kanë dalë masivisht të votojmë”, u shpreh Trump.
Trump theksoi edhe njëherë politikat e tij, duke thënë se parësore do të mbetet forcimi i kufijve për ndalimin e emigrantëve ilegalë. I pyetur nëse do t’i bënte thirrje mbështetësve të tij të mos i drejtohen dhunës, Trump tha se nuk ka nevojë ta bëjë një gjë të tillë, pasi ai dhe republikanët “nuk besojnë te dhuna”.
“Shumë mendonin se inflacioni është problemi më i madh, unë mendoj se emigrantët ilegalë janë problemi kryesor, më pas vjen inflacioni i lartë. Nuk kam pse ta them unë, nuk do të ketë dhunë, mbështetësit e mi janë njerëz të mirë, njerëz që besojnë jo te dhuna. Do të jem në Mar a Lago me Melanian, për të cilën jam shumë krenar. Libri i saj është më i shituri tani”, tha Trump.
Kandidati republikan tha se nuk e ka ende gati një fjalim në rast se fiton.
“Nuk e kam gati një fjalim. Nuk jam demokrat, nëse fitoj, nuk dua të mendoj për humbjen, por nëse fitoj jam i gatshëm ta mbaj një fjalim pa e përgatitur më parë”, përfundoi ai.
