Gjykata Kushtetuese nuk ka pranuar kërkesën e ish-kryeministrit Sali Berisha, për përjashtimin e gjyqtares Marsida Xhaferllari, e cila është partnerja e deputetit Enkelejd Alibeajt.
Në dokumentin e dorëzuar nga Sali Berisha në muajn tetor, thuhet se gjyqtarja Marsida Xhaferllari s’mund të marrë pjesë në shqyrtimin e kërkesave të tij, pasi është në konflikt interesi, përderisa është partnere e Alibeajt.
Ky i fundit është i vetmi deputet i opozitës që mori pjesë në këshillin e mandateve dhe votoi pro heqjes së mandatit për Sali Berishën në kohën kur u kërkua nga SPAK. Një argument tjetër i avokatëve është se Alibeaj ankimoi vendimin për vulën e PD-së, duke kundërshtuar Sali Berishën si kreun e PD-së.
Kujtojmë se më 19 nëntor, Gjykata Kushtetuese do të shqyrtojë ankimin e Berishës kundër masës së sigurimit.
