Rikthimi i Donald Trump si president i Shteteve të Bashkuara të Amerikës nuk shihet si një kërcënim për Kosovën.
Këtë e konfirmon vetë presidentja Vjosa Osmani. Duke folur në Samitin e Komunitetit Politik Europian në Budapest, shtoi se Kosova ka patur mbështetjen e çdo administrate amerikane që nga fillimi i viteve '90 dhe beson se kjo traditë do të vazhdojë.
“Nuk e shoh si kërcënim, Kosova në fakt ka përfituar për dekada nga një mbështetje dy partiake nga Shtetet e Bashkuara. Ne u bëmë të pavarur kur republikanët ishin në pushtet, ne u bëmë të lirë kur demokratët ishin në pushtet, ne punuam shumë ngushtë me çdo administratë dhe unë besoj fuqimisht që do të vazhdojë të jetë kështu”, tha Vjosa Osmani.
Sa i përket dialogut mes Kosovës dhe Serbisë, presidentja konfirmoi se po vazhdojnë diskutimet në Bruksel mes kryenegociatorëve për mënyrën e zbatimit të marrëveshjeve të arritura. Zonja Osmani ofroi mbështetje për Ukrainën, duke sjellë në vëmendje se Rusia nuk është kërcënim për shtetin e përfshirë nga lufta, por për të gjithë Europën dhe botën.
