Tifozët e Torinos janë në ethe pas humbjes në derbin ndaj Juventus, ndaj të cilëve nuk fitojnë që nga viti 2015. Përveç zhgënjimit nga një tjetër humbje në derbi, tifozët Granata, të cilët në prag të ndeshjes kishin kontestuar ashpër pronësinë, u rebeluan në rrjetet sociale për shkak të një videoje të xhiruar në bilbilin e fundit të ndeshjes në Stadium, i cili menjëherë u bë viral. Në shënjestër është Mërgim Vojvoda, anësori kosovar që u aktivizua në minutën e 64' në vend të Walukiewicz.
Kosovari u akuzua se, në fund të ndeshjes, pas një kontestimi të sektorit të mysafirëve, vendosi të ndërrojë fanellën e tij me shallin bardhezi të një tifozi të Juventus dhe me të në dorë u kthye në dhomat e zhveshjes. Një skenë që vërtetë nuk i ka pëlqyer fare tifozëve granata, tashmë të tërbuar nga disfata dhe mbi të gjitha nga performanca e djemve të teknikut Vanoli. E kështu, në rrjetet sociale kanë vërshuar sulmet dhe polemikat drejtuar lojtarit: “Po ku është respekt?".
Lexo më tej: Video/ Yildiz, gol e gjuha jashtë në ditëlindjen e Del Pieros: Juventus fiton derbin
INTERPRETIM I GABUAR
Gjesti ka bërë xhiron e internetit, por në fakt është keqinterpretuar. Ajo që mbante në dorë Vojvoda, sipas asaj që kanë sqaruar nga klubi granata, nuk ishte një shall i Juventus, por një shall i Kosovës, me ngjyrat verdheblu, ngjyra të përdorura edhe nga skuadra bardhezi, por jo në këtë rast. Vojovoda, kështu, vetëm sa ka treguar afeksionin me vendin e tij të origjinës, kështu që tifozët granata duhet t'i kërkojnë ndjesë për ofendimet që i janë bërë.
