Pas incidentit të vitit 2012 midis Delio Rossi dhe Adem Ljajic dhe përplasjes mes D’Aversa e Henry sezonin e kaluar, një “takim i afërt” i ri, që përfshin trajnerin dhe lojtarin ka tronditur futbollin italian, këtë herë në Serinë C. Tekniku i Triestina, Clotet, ka sulmuar egër lojtarin e tij Krollis, pasi ky i fundit u ndëshkua me karton të kuq.
Incidenti ndodhi pas një kartoni të kuq
Të premten në mbrëmje, gjatë ndeshjes së 14-të të Grupit A midis Triestina-s dhe Giana Erminio-s, sulmuesi letonez i ekipit vendas, Raimonds Krollis, u përjashtua nga loja në minutën e 33-të për një faull reagimi, duke e lënë ekipin e tij me dhjetë lojtarë. Ky episod e zemëroi trajnerin Pep Clotet, i cili nuk hezitoi të shfaqte pakënaqësinë ndaj lojtarit të tij: trajneri spanjoll iu afrua letonezit, e kapi dhe e tërhoqi disa herë ndërsa ky po largohej nga fusha. Në fund të ndeshjes, Clotet shprehu gjithë indinjatën e tij për atë që ndodhi, duke komentuar kështu episodin:
“Krollis është këtu në huazim nga Spezia, ai përfaqëson një shoqëri tjetër që e ka sjellë këtu dhe ai i bën këtë Triestina-s. Pse reagova kështu? Kam një djalë tetëvjeçar që sot e ka parë këtë dhe gjëra të tilla nuk mund të ndodhin: nëse një futbollist bën këtë në rrugë, ai rrezikon pasoja ligjore, kjo nuk është normale. Nuk duhet ta pranojmë në asnjë mënyrë; për mua, Krollis e ka mbyllur me Triestina-n. Këtë gjë ia kam thënë në sy, me mua ka mbaruar.”
Tani në prag të shkarkimit?
Një tjetër goditje e rëndë për Triestina-n, e cila është e fundit në renditjen e grupit të saj me vetëm 6 pikë të mbledhura në 14 ndeshje. Tani përgjegjësia i kalon klubit, i cili duhet të vendosë se çfarë masash të marrë ndaj trajnerit: pas këtij gjesti, drejtuesit po shqyrtojnë seriozisht mundësinë e shkarkimit të tij.
