Një tjetër episod dhune dhe papërgjegjshmërie në fushat e futbollit ndërkombëtar. Këtë herë ishte rasti i ndeshjes Honduras-Meksikë, e cila u fitua nga vendasit me rezultatin 2-0, por që pati një epilog shumë të shëmtuar menjëherë pas minutës së 90-të. Trajneri i Meksikës, Javier Aguirre, u godit nga një shishe kur po shkonte të përshëndeste stafin e pankinës honduriane: i plagosur në kokë, ai nuk e ndërpreu megjithatë gjestin e tij të fair-play, duke dalë nga fusha i mbuluar me gjak.
Shishja e godet në kokë: Aguirre largohet i gjakosur
Një episod shumë i shëmtuar, që ndodhi menjëherë pas çastit të fundit të ndeshjes Honduras-Meksikë. Ndeshja ishte e vlefshme për fazën e parë të çerekfinaleve të Ligës së Kombeve të Concacaf, e mbyllur me fitore 2-0 për vendasit. Viktimë e dhunës pa shkak nga tifozët vendas ishte trajneri i Meksikës, Javier Aguirre, ndërkohë që ai po shkonte t'i jepte dorën stafit kundërshtar. Trajneri i Meksikës u godit në kokë nga një objekt i hedhur nga tribunat, një shishe e hapur që e goditi në kokë ndërsa ai po kalonte normalisht në fushë. Ai mori një plagë të thellë që e detyroi të largohej nga fusha i mbuluar me gjak, por kjo nuk e pengoi të vazhdonte me gjestin e tij të bukur të fair-play.
Concacaf hap hetimin për incidentin
Në konferencën për shtyp, vetë Aguirre e minimizoi incidentin duke u përpjekur të fokusohej tek ndeshja dhe arsyet e humbjes së Meksikës. "Goditja në kokë? Nuk komentoj, është futboll: nuk ndodhi asgjë", ishin fjalët e tij që mundoheshin të zbutnin dhe zvogëlonin pasojat e ngjarjes. Megjithatë, ngjarja nuk ka kaluar pa vëmendjen e autoriteteve të futbollit dhe Concacaf ka vendosur të hapë një hetim zyrtar lidhur me incidentin.
Ky është njoftimi që ka dalë pas ndeshjes: "Concacaf dënon me forcë incidentin dhe aktin e dhunës që ndodhi pas përfundimit të ndeshjes së mbrëmjes së sotme të Ligës së Kombeve mes përfaqësuesve të Hondurasit dhe Meksikës, ku trajneri i Meksikës, Javier Aguirre, u godit nga një objekt i hedhur nga tribunat. Siguria e lojtarëve dhe tifozëve është një prioritet për Concacaf. Në futboll nuk ka vend për dhunë. Ky incident do t’i dërgohet tani Komisionit Disiplinor të Concacaf për shqyrtim dhe hetim."
