Një incident ka tronditur Kështjellën Windsor në MB, ku dy persona kanë arritur të kalojnë portën e sigurisë dhe të kryejnë një vjedhje.
Ngjarja ka ndodhur më 13 tetor, gjatë natës, kur William dhe Kate, ishin në shtëpinë e tyre dhe po flinin, bashkë me fëmijët e tyre.
Sipas raportimeve të “Independent”, dy burra dyshohet se janë ngjitur në një gardh të lartë për të hyrë në territorin mbretëror dhe më pas kanë përdorur një kamion të vjedhur për të thyer portën e oborrit të Kështjellës. Pas futjes në pronë, ata kanë vjedhur disa automjete dhe pajisje nga një fermë që ndodhet brenda kompleksit.
Burimet e policisë kanë zbuluar se dy të dyshuarit janë larguar me një kamionçinë të zezë Isuzu dhe një biçikletë, të cilat ishin ruajtur në një hambar pranë. Pas vjedhjes, ata janë drejtuar në drejtim të zonës së Vjetër Windsor dhe Datchet.
Në një deklaratë, policia ka konfirmuar se janë njoftuar rreth orës 23:45 të datës 13 tetor për ngjarjen. Ata kanë njoftuar gjithashtu se hetimet janë në vazhdim, dhe deri tani nuk ka pasur arrestime të bëra.
“Sulmuesit hynë në një ndërtesë rurale dhe u larguan me një kamionçinë dhe një biçikletë me katër rrota. Ata u drejtuan për në zonën e Vjetër Windsor/Datchet,” thuhet në njoftimin e policisë.
