Manchester City pëson humbjen e gjashtë në shtatë ndeshjet e fundit, e gjashta radhazi në kampionatin anglez, këtë herë në fushën e Liverpool-it. Një krizë e pafundme, e papritur dhe padyshim befasuese për “Citizens”, të cilët u mposhtën në Anfield me rezultatin 2-0. Ky dështim konfirmon momentin e vështirë të ekipit të Pep Guardiola, i cili vetëm pak javë më parë zyrtarizoi rinovimin e kontratës me City. Pikërisht trajneri spanjoll ishte objekt i një kori tallës nga tifozët e “Reds” në minutat e fundit të ndeshjes.
Nga tribunat dëgjohej kenga: “You’re getting sacked in the morning”, që përkthehet “Do të shkarkohesh nesër në mëngjes”. Fillimisht, Guardiola buzëqeshi në mënyrë sarkastike, por më pas reagoi duke ngritur gjashtë gishtat, një për çdo titull të Premier League të fituar nga Manchester City nën drejtimin e tij. Trajneri spanjoll nuk do ta kishte imagjinuar kurrë se do të duhej të përballej me talljet e kundërshtarëve pas sezoneve thuajse perfekte që ka drejtuar deri më tani.
Pas përfundimit të ndeshjes, lojtarët e Manchester City, së bashku me trajnerin e tyre, shkuan pranë sektorit të tifozëve të City për të kërkuar falje për paraqitjen e dobët. Edhe në këtë rast, Guardiola ngriti gjashtë gishtat, duke treguar numrin e titujve të Premier League që kanë fituar. Ky gjest duket si një mesazh që fton ekipin dhe tifozët të ecin me kokën lart, të ndërgjegjshëm për forcën, cilësinë dhe potencialin e ekipit, të kryesuar nga Haaland dhe shokët, që pritet të dalin së shpejti nga kjo krizë.
Fjalët e Pep Guardiola për të shpjeguar gjestin e tij
“Nuk e prisja këtë nga Anfield – tha Guardiola kur iu përgjigj pyetjes për korin dhe reagimin e tij. – Është në rregull, është pjesë e lojës dhe e kuptoj plotësisht. Kemi pasur beteja të pabesueshme së bashku.” Trajneri i Manchester City shtoi: “Të gjithë tifozët duan të më shkarkojnë, o zot i madh – theksoi Guardiola gjatë konferencës për shtyp pas ndeshjes. – Ndoshta kanë të drejtë duke parë rezultatet tona. Por nuk e prisja këtë nga Anfield, ndoshta nga Brighton”.
