Pas rreth dy vitesh që mbërritën në Vlorë, dy anijet central elektrik janë ndezur. Tigri 1 dhe Tigri 2 janë vënë në funksion për herë të parë ditën e djeshme ku edhe pse nuk ka patur asnjë njoftim zyrtar, ndezja e dy anijeve është parë te zhurma dhe tymi që lëshojnë grykat e oxhakëve.
Nuk ka shumë të dhëna mbi vënien në punë të dy anijeve për të cilat shteti paguhet një shumë e konsiderueshme qera çdo ditë.
Neës24 ka mësuar se pak ditë më parë ka mbërritur në Vlorë një anije me lëndën djegëse të Teceve e cila i ankorua pranë Petroliferës dhe depozituar në një prej depozitave të tyre.
Korporata Elektroenergjitike Shqiptare (KESH) i paguan çdo ditë 60.000 dollarë qira shoqërisë amerikane Excelerate Energy për dy TEC-et lundruese të ankoruara në Vlorë e që kanë mbërritur vitin e shkuar, por që nuk janë akoma as testuar.
KESH i paguan 30.000 dollarë tjetër në ditë shoqërisë italiane Renco për furnizimin e shërbimit të energjisë elektrike të gjeneruar nga dy TEC-et lundruese të cilët ndezën motorat por nuk ka njoftim për prodhim. Për shkak se asnjë kompani shqiptare nuk plotësonte asnjë kriter, sipas burimeve ka qenë vet shteti që e ka importuar lëndën djegëse.
Edhe për mbërritjen e lëndës djegëse nuk ka patur asnjë njoftim zyrtar ndërkohë që nuk ka ende asnjë njoftim mbi vendosjen në punë të këtyre mjeteve të kontestuara për shkak të impaktit në mjedis.
Kur është pyetur për kontratën e majme prej 64 milion dollarësh që paguan shteti shqiptar për këto dy tece, Belinda Balluku u mbrojt duke përmendur këshillat e ish ambasadores amerikane Juri Kim.
“Ka qenë diçka që së bashku me ambasadoren Kim kam punuar shumë për t’i pasur këto Tec-e lundruese” u shpreh Balluku disa muaj më parë, duke shtuar se “nëse nuk do të kishim pasur ndihmën e Departamentit Amerikan të Energjisë, nuk do t’i kishim marrë dot kurrë”.
Ekspertët kanë llogaritur se anijet-gjeneratorë do të kushtonin më pak, nëse do të ishin blerë. Nëse në total, për qiranë do të paguhet 64 milion dollarë, për blerjen e tyre do të paguheshin dhjetëra milionë më pak.
