Gjatë episodit të dytë të emisionit të tij Falsissimo, transmetuar në kanalin e tij në YouTube, Fabrizio Corona ka publikuar video, imazhe, dëshmi audio (përfshirë regjistrime telefonatash me një vajzë të përfshirë) dhe dokumente ligjore që implikojnë mbrojtësin e Milanit, Theo Hernandez. Pasi e përmendi emrin e tij disa ditë më parë, kësaj radhe Corona ka shkuar më tej duke nxjerrë detaje të tjera nga ngjarja. Episodi daton në janar 2024, por pamjet e asaj nate në një klub nate në Milano kanë kaluar nga duart e disa njerëzve dhe tani janë bërë publike. Për këtë çështje ka folur edhe Massimo Giletti në programin e tij në Rai 3, Lo stato delle cose, duke përmendur një futbollist “të një prej dy skuadrave të Milanos” që – sipas një videoje të shkurtër – “godet me grusht një grua, e cila rrëzohet pas agresionit.” Tani gjithçka është bërë e qartë.
Corona zbulon çfarë ndodhi atë natë
Ish-mbreti i paparacëve ka shkuar përtej dhe, falë një rrjeti të gjerë kontaktesh, ka rindërtuar të gjithë historinë. Ai e ka paraqitur, shpjeguar dhe mbështetur rrëfimin e tij me një dokument ligjor: një marrëveshje mes avokatëve të Theo Hernandez dhe pronarit të lokalit, ku kërkohej dëmshpërblim për mbylljen e çështjes me disa kushte (përfshirë fshirjen e videove të regjistruara nga kamerat e sigurisë). Megjithatë, sipas Coronës, pronari i lokalit vendosi që dëmi i marrë ishte shumë më i madh sesa dëmshpërblimi i rënë dakord (rreth 65 mijë euro) dhe kërkoi një shumë shumë më të lartë – deri në 800 mijë euro.
Lexo më tej: Inter apo Milan? Trondit Giletti: "Kam videon e një lojtari që godet një grua”
Në një video-telefonatë të transmetuar gjatë emisionit, një bashkëpunëtor i Milanit që merret me marketing dhe komunikim, pranon që klubi ishte në dijeni të situatës, por nuk ndërmori veprime: “Lojtari tha se çështja ndiqet nga avokati i tij dhe ne nuk mund të bëjmë asgjë. Për më tepër, ju tashmë keni bërë marrëveshje.”
Pamjet e incidentit dhe thirrjet telefonike
Corona tregon disa pamje tronditëse nga ngjarja: në një video shihet një vajzë e goditur me grusht nga një person që identifikohet si Theo Hernandez. Vajza, kur kontaktohet, thotë: “Nuk dua të jem pjesë e kësaj situate… dua të qëndroj jashtë.” Në një tjetër video, Theo shihet duke goditur me forcë një derë në lokal. Në një tjetër fragment, ai duket duke mbajtur një balonë me gaz esilarant, i cili, ndonëse nuk është drogë, shkakton eufori dhe humbje kontrolli, veçanërisht kur kombinohet me alkool. Corona e përshkruan këtë si një “shpërthim adrenaline” që, sipas tij, mund të ketë ndikuar në sjelljen agresive të lojtarit.
Çfarë propozojnë avokatët, për të mbyllur çështjen
Në dokumentin e zbuluar nga Corona, përshkruhen detajet e incidentit:
1. Incidenti: Në 31 janar 2024, Theo Hernandez, së bashku me miqtë e tij, kishte kaluar mbrëmjen në lokal. Rreth orës 1:40 të mëngjesit, pa ndonjë arsye të qartë, ai kishte goditur një vajzë në fytyrë dhe, më pas, kishte dëmtuar një mur të lokalit, duke shkaktuar dëme të konsiderueshme.
2. Fshirja e pamjeve: Dokumenti përfshin një klauzolë që kërkonte fshirjen e videove të incidentit nga kamerat e sigurisë, për të mbrojtur privatësinë e të përfshirëve.
3. Dëmshpërblimi: Dëmet ekonomike ishin vlerësuar në rreth 64,416 euro, duke përfshirë edhe humbjet nga mbyllja e lokalit gjatë rikonstruksionit.
4. Provat: Dokumenti përmend që pamjet nga kamerat e sigurisë tregojnë me qartësi dhunën e ushtruar nga Theo Hernandez, të cilat ishin të disponueshme për avokatët e tij dhe klubin Milan.
Denoncimi në polici
Në fund të transmetimit, Corona shfaqet duke dorëzuar dokumentet dhe materialet në polici, duke bërë një denoncim zyrtar për ngjarjen. Ai thotë se është i vendosur ta çojë çështjen deri në fund, pavarësisht pasojave.
