Union Saint-Gilloise, skuadra belge e njohur që këtë sezon është përballur me Romën në Europa League, ka gjetur një mënyrë humoristike për të ndëshkuar mesfushorin e saj, Loïc Lapoussin. Pas një deklarate të papërshtatshme për Cercle Brugge, kundërshtarët e tyre të fundit, klubi vendosi ta ndëshkojë në stilin e famshëm të Bart Simpson nga seriali i njohur animuar.
Loïc Lapoussin shkruan në dërrasë si Bart Simpson
Në një video të publikuar nga klubi, Lapoussin shfaqet duke shkruar frazën “Union-Cercle” pa pushim në një dërrasë, duke imituar skenën e hapjes së serialit The Simpsons. Ky veprim synonte t’i kujtonte lojtarit rëndësinë e respektimit të kundërshtarëve dhe tifozëve. Pas përfundimit të “ndëshkimit”, ai vrapon jo për në shtëpi, si Bart, por drejt fushës stërvitore.
Ndjesa publike e Lapoussin
Pas ndëshkimit, mesfushori nga Madagaskari kërkoi falje për komentet e tij: “Dëshiroj të kërkoj falje për komentet e mia për stadiumin dhe tifozët e Cercle Brugge, si dhe për unionistët tanë. Ishte e papërshtatshme dhe jo në frymën e sportivitetit”.
Komentet që shkaktuan këtë situatë ndodhën pas një ndeshjeje pa gola, ku Lapoussin kishte thënë: “Me gjithë respektin për Cercle, këto kushte (stadiumi me pak tifozë) nuk më bëjnë të kem dëshirë të luaj futboll. Nuk mendoj se është argëtuese as për tifozët të jenë këtu. Të luash kundër Club ose Cercle Brugge është një ndryshim i madh.”
Ky ndëshkim krijues dhe i lehtë pritet të shërbejë si një kujtesë miqësore për lojtarët mbi përgjegjësitë e tyre brenda dhe jashtë fushës.
