Qindra qytetarë, që këtë të enjte i janë drejtuar Drejtorisë së Përgjithshme të Transportit Rrugor për të marrë shërbimet që kryen kjo drejtori kanë mbetur në pritje për disa orë gjatë paradites.
Shkak, thonë punonjësit e DPTRRSh-së është rënia e “sistemit”.
Përkthyer me fjalë më të thjeshta, DPTRRSh ka probleme me linjën e internetit.
Për ironi, ndërsa qytetarët humbin orët e punës në radhë, në pritje që “sistemi” të funksionojë, kryeministri Edi Rama fliste sot për futjen e AI, inteligjencës artificiale në sistemet e shërbimeve.
“Vitin e ardhshëm do të lançojmë edhe modelin e ri të AI në e-Albania dhe asistenti digjital që sot është në formën e komunikimit me shkrim do të kthehet në një asisten-e e/i gjallë, do të kryejë të gjithë procesin e dhënies së shërbimit” shprehej ai në një aktivitet qeveritar.
Se mund të implementohet inteligjenca artificiale në një sistem që ka probleme me lidhjen e internetit, këtë mund ta shpjegojë vetëm një politikan që tashmë e ka humbur lidhjen me realitetin.
Në ndërkohe qindra qytetarë i kanë humbur disa orë pune për shkak te “sistemit” që sigurisht, kur duhen paguar taksat, nuk fal asnjëherë.
