Gazeta gjermane BILD ka publikuar detaje të reja mbi personin që futi një fuoristradë tip BMW në mes të një turme njerëzish në tregun e Krishtlindjeve në qytetin e Magdeburg duke lënë të paktën 2 viktima dhe 68 të plagosur.
Sipas të njëjtave burime, autori është me profesion mjek dhe jeton në Bernburg (Saale) ku punon në një klinikë. Ai ka ardhur nga Arabia Saudite dhe është 50 vjeç.
Në foton më lart shihet autori i shtrirë në tokë. Një oficer policie qëndron pak metra më tutje me armën e nxjerrë. Pjesa e përparme e makinës së tij është dëmtuar rëndë.
Ai ndodhej në Gjermani që nga viti 2006 dhe ka marrë një leje të përhershme qëndrimi si mjek. Ai nuk thuhet se ka qenë i njohur për autoritetet apo të kishte tërhequr vëmendjen si islamist.
Kryeministri i landit Reiner Haseloff tha se njëra nga viktimat është një fëmijë i vogël. 15 nga të plagosurit janë në gjendje të rëndë. Ngjarja ndodhi në orën 19:04. Autori përshkoi me makinë mbi 400 metra mes njerëzve në tregun e Krishtlindjeve. ©LAPSI.al
