Teksa po afrojnë zgjedhjet parlamentare të 2025-ës, zv.ndihmëssekretari amerikan i Shtetit për Ballkanin Perëndimor, Alexander Kasanof, ka bërë një thirrje për partitë politike. Kasanof tha në një intervistë për Zërin e Amerikës se zgjedhjet duhet të jenë të lira dhe të ndershme. Gjithashtu, ai kërkoi që kandidatët për deputetë të jenë tërësisht të panjollosur nga korrupsioni apo nga lidhjet me krimin e organizuar.
“Pritshmëritë tona janë njësoj si për cilindo vend që zhvillon zgjedhje, që presim të shohim zhvillimin e zgjedhjeve të lira dhe të ndershme dhe që do të respektohet vullneti i popullit. Po ashtu, shpresojmë fort që do të shohim kandidatë që janë tërësisht të panjollosur nga korrupsioni apo nga lidhje me krimin e organizuar. Mendojmë se do të ishte rezultati më i mirë për Shqipërinë”, theksoi Kasanof.
