“Është një kënaqësi dhe gëzim i madh, arrij të mbyll një formë të projektit që kisha përgatitur. Nuk kisha menduar 3 kupa, një Kupë Shqipërie do e meritonim vitin e parë. Viti i dytë gjithçka perfekte. Do t’i falënderoj këta djem, që i kam mërzitur pafund. Dominuam si në lojë dhe rezultate. Çdo gjë që e kisha menduar ka dalë". Edlir Tetova, tekniku i Egnatias i gëzohet trofeut të parë sezonal, që mbyll vitin 2024. Tekniku, që rrëmbeu edhe titullin e kampion e Kupën e Shqipërisë sezonin e kaluar bën një bilanc të shpejtë: "Mund të bënim më mirë në Europë, sidomos ndeshjen e Champions, meritonim më shumë me lojën që kemi bërë".
Tetova, pastaj, tregoi sa shumë e donte Egnatia këtë trofe: "Ka pasur lojtarë që donin pushim, jemi munduar t’i mbajmë në tonus me lojëra argëtuese. Përgatitja ka qenë më shumë teorike, se fizike dhe tekniko-taktike. Një trofe shumë i rëndësishëm për mua dhe çunat. Kukësi e ka merituar finalen, s’ka pse të kishte ekip tjetër - tha Tetova -. Në finale gjithçka është e barabartë, nuk ishte asgjë e lehtë. Kukësi militon në Kategorinë e Parë, por nuk do të thotë asgjë, se është vetëm një ndeshje".
ÇELA JEP DORËHEQJEN: "KY ËSHTË MAKSIMUMI"
“Jam shumë i kënaqur nga të gjithë lojtarët, dhanë maksimumin, duhet të merrnim pak më shumë përsipër. Patëm momentet tona. Po të realizonin, mund ta vendosnim në vështirësi Egnatian. Nga lojtari i parë te i fundit, jemi të kënaqur. Ishte një finale për t’u shijuar, këtu ishte theksi që i kam venë lojtarëve. Kemi ekip të ri, brenda vetes, doja ta fitoja, patjetër". Emiljano Çela, tekniku i Kukësit, nuk ka arritur dot të shijojë fitoren dhe trofeun e tij të parë si trajner, por vlerëson mënyrën me të cilën Kukësi i Kategorisë së Parë u përball me kampionët e Superiores Egnatias.
Lexo më tej: Video/ Egnatia bën tripletë: Ujka e Bakayoko thyejnë Kukësin e sigurojnë Superkupën
I ndërgjegjshëm për mundësitë e tij, Çela nuk priste më shumë se sa një lojë dinjitoze: "Ato ishin mundësitë tona, më besoni që është maksimumi. Po të shënonim do të shpresonim që ndeshja të kishte histori tjetër. Thjesht pjesëmarrja në këtë ndeshje, i bëri që ta dashurojnë më shumë lojën dhe ta rrisnin punën". Tekniku pastaj konfirmoi edhe largimin nga pankina e Kukësit: "E ardhmja? Ato çfarë ka thënë administratori, atyre deklaratave iu qëndroj edhe unë”, deklaroi Çela për “RTSH Sport”.
