Presidenti rus Vladimir Putin deklaroi këtë të enjte se homologu i tij amerikan Joe Biden i kishte propozuar atij në vitin 2021, pra para nisjes së luftës që të “shtyhej pranimi i Ukrainës në NATO me 10-15 vjet“.
Anëtarësimi në Aleancën e Atlantikut të Veriut ka qenë një kërkesë e kahershme e Kievit.
“Në vitin 2021, presidenti aktual Biden më propozoi pikërisht këtë: të shtyhej pranimi i Ukrainës në NATO për 10-15 vjet, sepse vendi nuk ishte ende gati. Unë u përgjigja logjikisht ‘po, (Ukraina) nuk është gati sot. Por ju do ta përgatisni atë që të jetë gati dhe do ta pranoni'” (si anëtar)”, - tha Putin gjatë një konference për shtyp në televizion.
Kievi e paraqet anëtarësimin në NATO si të domosdoshëm për sigurinë e tij përballë Rusisë dhe kërkon një ftesë për t’u anëtarësuar sa më shpejt të jetë e mundur. Kremlini paralajmëron vazhdimisht se pranimi i Ukrainës në NATO do të përbënte një kërcënim “të papranueshëm” për Rusinë.
Gjatë konferencës për shtyp, Putin tha se "Rusia kërkon t'i japë fund konfliktit, jo ta ngrijë atë". Duke iu përgjigjur një pyetjeje të gazetarëve në lidhje me planet e Donald Trump për të ngrirë luftën në Ukrainë, Putin u përgjigj: "Ne gjithashtu përpiqemi t'i japim fund konfliktit".
Sipas Putin, Sllovakia është e gatshme të ofrojë një platformë negociuese për bisedimet midis Rusisë dhe Ukrainës për t'i dhënë fund luftës, dhe kjo është në rregull për Moskën. Ditët e fundit, kryeministri sllovak Robert Fico u prit në Kremlin. “Ka pasur diskutime kryesisht për një marrëveshje paqeje në Ukrainë”, - komentoi presidenti rus. ©Përgatiti LAPSI.al
