Kryedemokrati Sali Berisha u paraqit në Prokurorinë e Posaçme Antikorrupsion, për të zbatuar masën “detyrim paraqitje”, që Apeli i GJKKO vendosi për të javën e kaluar. Ndërkohë, jashtë SPAK janë mbledhur demokratë në mbështetje të kryetarit të PD-së. Berisha qëndroi në ambientet e Prokurorisë së Posaçme vetëm pak minuta, ndërsa mbajti një deklaratë për mediat pas daljes.
"Organizata kriminale, skapi i partisë kërkoi nga gjykatësi kukull që Sali Berisha t‘i rikthehet arresti në shtëpi jo se prish provat, jo se kanë fakte, por sepse ka sulmuar gjykatëset dhe prokurorët.
Do të sulmoj të gjithë ata që bashkëpunojnë me krimin. Berisha ka sulmuar dhe do të faktojë që sot se si Dumani fle mbi dosje krimi, do faktoj se si këta anëtarë të organizatës kriminale në deklaratat e tyre deklarojnë se është blerë me 380 metra katrorë apartamentin, ndërsa ekspertët i kërkon të vlerësojnë me 500 metra katrorë ndërtimet e viteve ’70. Dumani është kryekriminel elektoral sepse ka mbyllur të gjitha dosjet e krimit monstruoz kriminal. Aty gjeta McGonigalin që po i bënte kurs Dumanit, po i bënte kurs.
Mund t’ju duket çudi por kjo është e vërteta. Nuk e solla unë McGonigal aty. Ai i thoshte kështu duhet të veprosh herët e tjera", tha Berisha ndër të tjera.
