Merkatoja e dimrit është ndezur papritur. Napoli mund të bëjë një ndryshim të bujshëm në sulm me Edon Zhegrova, i cili mund të zëvendësojë Kvaratskhelia, që duket gati të largohet menjëherë për t’u transferuar te PSG. Zërat mbi të ardhmen e lojtarit gjeorgjian janë bërë gjithnjë e më të forta. Klubi i De Laurentiis nuk po bllokon negociatat, ndërkohë që planifikon se si të shpenzojë një shumë të madhe parash që mund të vijë nga Franca. Pasardhësi i Kvaras mund të vijë nga Franca, pikërisht nga Lille. Zhegrova është sulmuesi anësor i kombëtares së Kosovës, që preferon të luajë me këmbën e majtë.
Zhegrova, pasardhësi i Kvaratskhelia
Kvaratskhelia dukej i paprekshëm, një nga simbolet e ekipit, por rinovimi nuk po vjen dhe negociatat me PSG-në janë ndezur papritur. Drejtuesit e Napolit e dinë mirë që gjithçka është e mundur në merkato dhe duhet të jenë të përgatitur me zëvendësues. Kandidati i zgjedhur për të zëvendësuar Kvara-n është Edon Zhegrova, një lojtar i lindur në vitin 1999, që ka një histori të lidhur me Italinë. Në të kaluarën është ndjekur nga Napoli, por edhe nga Juventus dhe Milani, me të cilin ka luajtur kur ishte fëmijë.
Në moshën 12-vjeçare luajti me Milan
Zhegrova ka lindur në vitin 1999 dhe përfaqëson kombëtaren e Kosovës. Ai ka lindur në Gjermani nga një familje që u largua nga Ballkani për shkak të luftës, pak para lindjes së tij. Dy vite më vonë, u kthye për të jetuar në Kosovë, një vend që e do dhe e ka zgjedhur për ta përfaqësuar në nivel ndërkombëtar. Një zgjedhje e fortë, duke pasur parasysh se ai kishte mundësinë të luante edhe për Gjermaninë (ku ka lindur), Shqipërinë (atdheu i prindërve) dhe Belgjikën (ku u transferua në moshën 15-vjeçare).
Lexo më tej: Portret/ Gazeta franceze në gjurmët e Zhegrovës në Prishtinë
Ai tregoi talentin e tij për futboll që në moshë të re. Kur ishte vetëm 12 vjeç, veshi fanellën e Milanit në një kamp veror të organizuar nga klubi kuqezi në Prishtinë. Zhegrova e kujton kështu atë eksperiencë: “Dyqind futbollistë të rinj u ftuan për të bërë testime. Unë mbërrita, u vesha shpejt dhe aty gjithçka ndryshoi për mua dhe familjen time. Sepse kuptova që mund të bëhesha futbollist.” Kampi shkoi aq mirë, sa Zhegrova u ftua nga klubi në San Siro: “U gjenda në Milano, pashë një ndeshje kundër Chievos dhe takova edhe Kakà dhe Pato.”
Pastaj Belgjika, Baseli dhe Lille
Karriera e tij vazhdoi gradualisht, fillimisht në atdhe dhe më pas në Belgjikë, ku kaloi nga St.Truiden te Genk, duke zënë vendin e Malinovskyi, e më pas te Baseli dhe Lille. Në janar të vitit 2022, Lille e bleu atë për të zëvendësuar Ikoné-n (një tjetër lidhje me Serie A). Zhegrova ka treguar një talent të mirë, është rritur nën drejtimin e Fonseca-s dhe këtë sezon është konfirmuar me 2 asistime dhe 8 gola në 21 ndeshje për Lille.
Ku do të luajë Zhegrova te Napoli?
Edon Zhegrova është një sulmues anësor dhe është këmbë-majtë. Kjo ngre pyetjen: pse ai duhet të jetë zëvendësuesi i Kvaratskhelia-s, kur ky i fundit ka këmbën e djathtë si më të fortë? Në futbollin modern, kjo ndikon më pak, por Napoli ka tashmë disa lojtarë këmbë-majtë në sulm: Neres, Politano dhe Ngonge. Në idenë e trajnerit Conte, Neres mund të luajë në krahun e djathtë, ndërsa në të majtë mund të vendoset Zhegrova.
