Për shkak të kushteve të vështira atmosferike, Policia Kufitare Greke ka njoftuar Policinë Kufitare të Korçës se duke nisur nga ora 17:00 e ditës së sotme, lëvizja e mjeteve të tonazhit të rëndë (kamionë) përmes Pikës së Kalimit Kufitar Kapshticë drejt Greqisë është pezulluar deri në një njoftim të dytë.
Përveç bllokimit të lëvizjes së mjeteve të tonazhit të rëndë (kamionë), do të ndalohet lëvizja deri në një njoftim të dytë dhe për autobuzët. Aktualisht, lejohet vetëm kalimi i autoveturave me kusht që ato të jenë të pajisura me goma dimërore dhe zinxhirë, për të garantuar sigurinë në rrugë.
Policia e Shtetit i bën thirrje drejtuesve të mjeteve të tonazhit të rëndë që kanë planifikuar të udhëtojnë drejt Greqisë përmes kësaj pike kufitare, të shmangin lëvizjen deri në një njoftim të ri, i cili pritet të bëhet ditën e nesërme nga autoritetet greke.
