Detaje të reja janë zbardhur nga operacioni i sotëm policor në Pogradec. RENEA, FNSH, Forcat Shqiponja dhe policia kanë kryer kontrolle në 29 banesa në total, ku brenda tyre janë gjetur sende të jashtëligjshme të eksponentëve të botës së krimit.
Siç e raportuam edhe më herët, deri më tani si rezultat i operacionit janë shoqëruar në komisariat dhe po merren në pyetje 14 persona. Sipas informacioneve për pjesën më të madhe të tyre do të ketë arrestim. Kontrolle janë kryer edhe në banesën e Erjon Llapushi, i cili nuk është gjetur aty.
Ndërkohë, efektivët kanë sekuestruar armë të llojit shotgun, pistoleta, përfshirë dhe modele të sofistikuara armësh maskuese si thika në forma stilolapsi.
Në disa shtëpi të kontrolluara u gjetën mbi 100 milion lekë, 26 mijë dollarë, 500 kg karburant që dyshohet të jetë kontrabandë, si dhe janë sekuestruar edhe aparate celular që përdoreshin për lojëra fati. Në 3 banesa është gjetur edhe sasi lënde narkotike kokainë.
