Dy persona janë shpallur në kërkim lidhur me plagosjen e ndodhur mbrëmjen e djeshme në Orikum.
Policia shpall në kërkim Qerim Bellon dhe personin e dytë që e ndihmoi. Autorët qëlluan me armë edhe në largim e sipër. Sildi Velaj u dërgua për mjekim në Tiranë, pasi mori 4 plumba në trup. Ngjarja dyshohet të jetë nisur nga një sherri për motive të dobëta.
Policia bën me dije se kanë marrë pjesë dy persona, njëri prej tyre Qerim Bello, autori i ngjarjes, ndërsa personi i dytë mendohet se ka qenë drejtuesi i mjetit dhe ka ndihmuar Bellon të largohet nga vendi i ngjarjes.
Burime të grupit hetimor bëjnë me dije se ngjarja është zbardhur plotësisht dhe po punohet për arrestimin e autorëve.
10 plumba pistolete u qëlluan në drejtim të 29-vjeçarit, ndërkohe që 4 plumba e kishin prekur Sildi Velajn, i cili u transportua mbrëmjen e djeshme në Tiranë për mjekim më të specializuar. I plagosuri në momentin e ngjarjes ka qenë duke luajtur letra në brendësi të karburantit me disa shok.
Autori ka hyrë në lokal dhe e ka qëlluar me armë disa herë, pastaj ai dhe bashkëpuntori i tij kanë hipur në makinë për t’u arratisur. Në momentin e largimit, një person ka dalë nga lokali dhe nga makina është qëlluar përsëri me armë nga autorët.
