Përleshjet në rajonin Catatumbo të Kolumbisë verilindore kanë lënë 54 persona të vdekur pas një vale dhune e cila shpërtheu në një zonë në kufi me Venezuelën. Përleshjet janë ndezur në rajon që kur luftëtarët e ELN-së shënjestruan disidentët nga ish-Forcat e Armatosura Revolucionare të Kolumbisë (FARC), e cila nuk nënshkroi marrëveshjen e paqes të vitit 2016 dhe vazhdon të veprojë.
Kjo valë dhune është përgjegjëse për 54 vdekje të konfirmuara, 11 plagosje, 12 zhdukje dhe 48,000 shpërngulje të detyruara, sipas të dhënave më të fundit nga autoritetet në departamentin Norte de Santander, të cilit i takon administrativisht Catatumbo.
Nga dita e djeshme raportohet për të paktën 80 të vdekur, bazuar në njoftimet nga terreni. Përleshjet e reja mes rebelëve, që nga e premtja e kaluar, rezultuan me vdekjen e 13 personave. Prefektura në Norte de Santander sqaroi se viktimat ishin disidentë të FARC.
Sipas Avokatit të Popullit, një autoritet publik i pavarur përgjegjës për mbrojtjen e të drejtave të njeriut, zhvendosjet janë më të regjistruarat që nga viti 1997, kur në Kolumbi filluan të mbaheshin statistika sistematike mbi fenomenin.
Qeveria e Presidentit Gustavo Petros ka vendosur më shumë se 10,000 anëtarë të forcave të armatosura dhe policisë në rajon, i cili është një rrugë kryesore e trafikut të drogës dhe shtëpia e plantacioneve të kokainës, bimë gjethet e së cilës janë baza për prodhimin e kokainës. Kolumbia është vendi me prodhimin më të madh të kësaj substance në botë.
