Është arrestuar në Elbasan 36-vjeçari Gerti Mustafa, i cili dyshohet se i ka vendosur zjarrin qëllimisht një mjeti të parkuar në lagjen “Aqif Pasha”.
Policia bën me dije se për motive të dobëta, 36-vjeçari e ka djegur me lëndë djegëse (benzinë) mjetin në pronësi të shtetasit me iniciale S. M.
"Finalizohet nga Komisariati i Policisë Elbasan, operacioni policor i koduar “The last fire”.
Veprimet hetimore zbardhin djegien e qëllimshme të një automjeti, që paraprakisht u dyshua për shkaqe aksidentale. Identifikohet, kapet dhe vihet në pranga autori i dyshuar.
Shërbimet e Komisariatit të Policisë Elbasan, në vijim të veprimeve hetimore të thelluara për zbardhjen e rrethanave të djegies së një automjeti në lagjen “Aqif Pasha”, më datë 23.01.2025, që fillimisht u dyshua aksidentale, bazuar në provat e administruara dhe në inteligjencën policore, kanë organizuar dhe finalizuar operacionin policor të koduar “The last fire”.
Si rezultat i operacionit u arrestua në flagrancë shtetasi Gerti Mustafa, 36 vjeç, banues në Elbasan, i dënuar më parë për disa vepra penale.
Nga veprimet hetimore dyshohet se 36-vjeçari, më datë 23.01.2025, gjatë natës, në lagjen “Aqif Pasha”, për motive të dobëta, ka djegur me lëndë djegëse (benzinë), një automjet të parkuar, në pronësi të shtetasit S. M. Nga përhapja e flakëve u dogj pjesërisht dhe një automjet tjetër i parkuar aty pranë.
Materialet procedurale i kaluan Prokurorisë pranë Gjykatës së Shkallës së Parë të Juridiksionit të Përgjithshëm Elbasan, për veprën penale “Shkatërrimi i pronës me zjarr”, njofton policia.
