Izraeli nuk e dinte paraprakisht se deri ku mund të arrinte propozimi i presidentit amerikan Donald Trump për Gazën dhe kabinetin izraelit dukshëm e ka gjetur të papërgatitur. Kështu tha një këshilltar i lartë i kryeministrit të Izraelit, Benjamin Netanyahu për “Times of Israel” kur u pyet për të komentuar deklaratat e presidentit amerikan pas takimit të tij me kryeministrin izraelit.
“Ne e dinim idenë, por ajo që na befasoi ishte shkalla e këtij propozimi” tha zyrtari.
Ndërkohë, një burim politik izraelit i tha Reuters sot se vizita e Netanyahut në Shtëpinë e Bardhë ishte “shumë e suksesshme dhe i tejkaloi të gjitha pritshmëritë dhe ëndrrat tona”.
Lexo më tej: Shpërngulja e palestinezëve/ Trump nuk do të pranojë një JO nga vendet pritëse
Marrëdhënia mes Netanyahut dhe presidentit amerikan Donald Trump nuk ka qenë kurrë më e mirë dhe më e ngushtë, tha burimi, duke shtuar se Trump ka gjetur “zgjidhje shpikëse” për problemet që kanë pllakosur shtetin e Izraelit që nga themelimi i tij.
Donald Trump propozoi mbrëmjen e kaluar teksa priti në Shtëpinë e Bardhë kryeministrin izraelit, Netanyahu se popullsia palestineze e Gazës duhet të shpërngulet dhe të akomodohet në 6 shtetet fqinje arabe. Veçanërisht, Trump tha se Egjipti dhe Jordania duhet të strehojnë banorët e Gazës. Rripin e Gazës, tha Trump do ta rindërtojë ushtria amerikane me synim për ta kthyer në një destinacion turistik.
Lexo më tej: Spastrimi i Gazës: E gjithë bota reagon furishëm kundër Trump
