Kanë ardhur reagimet e para të partive të Kosovës pas mbylljes së kutove të votimit dhe daljes së “exit poll”-eve të para. Lëvizja Vetevendosje ka bërë një komnet në rrjetet sociale duke u kërkuar komisionerëve të mos shpërqendrohen dhe të jenë vigjilentë në numërimin e votave.
“Të dashur vëzhgues dhe komisionerëve, ju jeni mbrojtësit e vullnetit popullor andaj vigjilencë dhe përkushtim për mbrojtjen e votës. Punë të mbarë!” – thuhet në reagim duke shmangur komentet për exit poll.
Nënkryetarja e Partisë Demokratike të Kosovës (PDK), Vlora Çitaku, ka shprehur optimizëm për rezultatin e zgjedhjeve, duke falënderuar qytetarët për një tjetër proces elektoral të suksesshëm.
LEXO EDHE: Dalin “exit poll”: Kush i fiton zgjedhjet në Kosovë
“I falënderoj qytetarët e Kosovës për edhe një proces elektoral tjetër të shkëlqyeshëm. Mburremi me fushatën dhe me ditën e zgjedhjeve. Presim rezultatet, por qysh tani kemi arsye për të qenë optimistë,” - ka shkruar Çitaku në Facebook.
Ajo shtoi se pas përfundimit të zgjedhjeve, fokusi i PDK-së do të jetë tek puna për të bërë Kosovën më të mirë.
Ndërsa kreu i PSD-së, Dardan Molliqaj ka reaguar pas publikimit të rezultateve të Exit Poll-eve të para që nxjerrin fituese LVV-në. Molliqaj shkroi në Facebook se opozita nuk duhet me asnjë kusht të bëjë koalicion me Vetëvendosjen.
“Kjo është një fitore për Kosovën! Opozita nuk duhet, me asnjë kusht, të bëjë koalicion me VETËVENDOSJE. 40% nuk është megjithatë dështim, është një paralajmërim se propaganda ende mban peshë përballë zbrazëtisë ideologjike. Ne e kundërshtojmë VV-në sepse ajo e sheh shtetin si pronë dhe qytetarin si mjet. Demokracia nuk rrezikohet vetëm nga ata që sundojnë, por edhe nga ata që nuk kanë asgjë për t’i kundërvënë. Urime të gjithëve!”, - thotë ai. /LAPSI.al
