Deri në orën 16:04 në Kosovë janë numëruar 96.45 për qind të kutive të votimit, në kuadër të zgjedhjeve parlamentare të 9 shkurtit.
Sipas të dhënave nga KQZ, Lëvizja Vetëvendosja ka fituar 41.11%, të votave, PDK-ja 22.28%, LDK-ja, 17.78%, AAK-ja 7.46, Lista Serbe 3.98% e Koalicioni për Familje 2.28%.
Kujtojmë se për shkak se sistemi online i Komisionit Qendror të Zgjedhjeve doli jashtë funksionit, kreu i KQZ-së njoftoi se numërimi i votave do bëhet manualisht.
“Gjithçka ishte gati t’i transmetojmë rezultatet preliminare si edhe në të kaluarën, aplikacioni nuk ka funksionuar, nuk po arrijmë t’i transmetojmë të dhënat përmes platformës. U kërkojmë ndjesë të gjithë qytetarëve. Në këto rrethana kemi shqyrtuar situatën dhe do t’i mbledhim të dhënat në mënyrë manuale.
Sigurojmë qytetarët që mostransmetimi i të dhënave preliminare përmes platformës elektronike nuk ka ndikim në rezultat. Pasi t’i grumbullojmë do t’i publikojmë, nuk e di, në ora 3 apo 4 të mëngjesit”, ka thënë Radoniqi.
Komisioni Qendror i Zgjedhjeve njoftoi pas mbylljes së qendrave të votimit, pjesëmarrja në zgjedhje ka qenë 40.04 %.
Siç bëri të ditur Valmir Elezi, zëdhënës i KQZ-së, në një konferencë për media në mbrëmje, të drejtën për të votuar e kanë shfrytëzuar mbi 799 mijë qytetarë. Ai ka thënë se në zgjedhjet e shkuara, të drejtën për votë e kishin shfrytëzuar mbi 827 mijë votues.
Qytetarët e Kosovës shprehën dje vullnetin e tyre gjatë orëve të votimit.
Në garë janë 28 subjekte politike, të cilat garojnë me 1280 kandidatë për 120 karriget në Kuvendin e Kosovës.
Zgjedhjet e 9 shkurtit ishin zgjedhjet e para të rregullta që Kosova ka mbajtur që nga shpallja e pavarësisë. Vëzhguesit thanë se zgjedhjet ishin të qeta, me disa parregullsi, por pa incidente të mëdha.
Dalja ishte 40.59 për qind e mbi 1.9 milion votuesve me të drejtë vote në Kosovë. Paraprakisht, për këto zgjedhje kanë votuar edhe diaspora, përmes postës, por edhe fizikisht në disa përfaqësi diplomatike të Kosovës në botë..
