Lideri i madh e ai që shpërfaqej si "dashnori" i reformës në drejtësi tashmë ka ndërruar pllakë. Qëndrimi i tij ndaj SPAK nuk është larg atij që ka mbajtur Sali Berisha apo Ilir Meta. Rama i ka shpallur luftë të hapur Prokurorisë së Posaçme. Në fjalën e tij për 105 vjetorin e shpalljes së Tiranës kryeqytet i Shqipërisë, Rama u mundua të rrëzonte të gjithë procesin e SPAK kundër Erion Veliajt.
Edi Rama: Kemi lënë boshllëk në panoramën e zhvillimeve pozitive, por jo vetëm pozitive të drejtësisë së re. Për këtë sfidoj këdo. Këta që na ngrenë dhe na ulin rrugëve… për mua janë rrugëve. Mua ajo që ndodh në udhëkryqet e kanaleve të mbrëmjes është rrugaçëri.
Është ngritja e llumit të gojës në piedestal. Është triumf i shpifjeve, shkatërrimit të çdolloj personi për të vetmin faj që bën, që është person publik. Në ato udhëkryqe, unë i sfidoj që të bëjnë një kërkim dhe ta gjejnë një tjetër forcë politike në Evropën ish-Lindore, në rajon nuk kanë për ta gjetur dot. Ta gjejmë një forcë politike që në 5 vjet rresht ka qepur gojën dhe ka thënë ‘keni mbështetjen tonë’.
Nëse Erioni dhe e shoqja kanë blerë 800 mijë euro fustane dhe bizhuteri ne nuk kemi çfarë diskutojmë. Por kemi të drejtën të kërkojmë prova. Ne kemi të drejtën të themi që ne ndërkohë, hedhja e kësaj shifre në mexhelis është e qëllimshme.
