Milan mposhti Veronën dhe arriti fitoren e dytë radhazi në kampionat, pas suksesit në transfertë ndaj Empolit në javën e kaluar. Kuqezinjtë i falen sërish Santiago Gimenez, i cili realizoi golin e tij të dytë radhazi pas atij në “Castellani”. Një fitore e rëndësishme për ekipin e Conceicaos, vetëm pak ditë para ndeshjes vendimtare kundër Feyenoordit në Champions League. Përballja e parë u karakterizua kryesisht nga gabimi i Mike Maignan, i cili pas ndeshjes me Veronën foli në një intervistë për DAZN.
Por biseda live me portierin francez u shoqërua nga një moment sikleti të madh për të gjithë të pranishmit. Nga gazetari Tommaso Turci te Marco Parolo dhe komentatori Dario Mastroianni, të cilët mbetën të habitur kur, papritur, Maignan u zhduk nga ekrani pikërisht gjatë intervistës. Një pyetje e papërshtatshme? Një reagim instinktiv nga portieri? Sjellja e tij u keqkuptua në transmetim direkt, por më vonë u bë e qartë se çfarë kishte ndodhur në të vërtetë.
Momenti kur Maignan largohet nga intervista
Portieri i Milan po u përgjigjej pyetjeve të Tommaso Turcit dhe Marco Parolos nga fusha e “San Siros”. Ai dukej i bezdisur kur u pyet nëse tani kishte rifituar formën e tij më të mirë: “Nuk më pëlqen kjo pyetje, por jam pozitiv dhe i motivuar për të vazhduar punën.” Më pas fjala i kaloi Mastroianni, i cili e pyeti për rinovimin e kontratës – një çështje e nxehtë në këto orë – por pikërisht në atë moment, Maignan u zhduk nga ekrani dhe u shfaq vetëm mikrofoni. Megjithatë, nuk bëhej fjalë për një refuzim nga ana e tij, por për një keqkuptim të situatës.
Lexo më tej: Gafa e Maignan dënon Milan ndaj Feyenoord: penallti e polemika në Bryzh për Atalantën
Çfarë ndodhi realisht gjatë intervistës me Maignan?
DAZN sqaroi se largimi i Maignan nga intervista ndodhi për shkak të problemeve teknike me lidhjen, dhe as ai dhe as Mastroianni nuk kishin dëgjuar pyetjen. Pra, asnjë polemikë nga portieri francez, i cili është shumë pranë rinovimit të kontratës deri më 30 qershor 2029. Më parë, Maignan ishte përgjigjur normalisht dhe kishte theksuar rëndësinë e fitores: “Ishte një rezultat i rëndësishëm, donim të fitonim, pavarësisht nga gjithçka. Nga nesër do të mendojmë për Feyenoord”.
